శ్రీ భద్రకాళీ(సావిత్రి) శక్తిపీఠం

శ్రీ భద్రకాళీ(సావిత్రి) శక్తిపీఠం భారతదేశంలో, హర్యానాలో(ఏకైక శక్తి పీఠం),(చండీగఢ్ నుండి 90కి.మి.,ఢిల్లీ నుండి160 కి.మీ.) కురుక్షేత్ర జిల్లాలో,కురుక్షేత్ర రైల్వే స్టేషన్ కు ౩ కి.మీ, పిపళి(Pipli) బస్సుస్టాండ్ నుండి 7 కి.మి. దూరంలో, థానేశ్వర్ (స్థానేశ్వర) పట్టణంలోని శ్రీ భద్రకాళీ దేవి ఆలయంలో వుంది. ఇక్కడ సతీ దేవి కుడి మడమ (Right Ankle) పడినదని చెపుతారు. ఈ శక్తి పీఠంను సావిత్రి పీఠం, కాళికా పీఠం, దేవి కూప్ (Devi Koop) ఆలయంగా కూడా పిలుస్తారు.

ఈ థానేశ్వర్ సమీపంలోని కురుక్షేత్ర పట్టణంలో గతించిన తమ పెద్దలకు పిండ దానాది క్రియలు ఆచరిస్తారు. ఇదే కాకుండా ఈ పట్టణంలోనే మహా బారత యుద్ధం జరిగింది. ఈ యుద్ధాన్నే ’కురుక్షేత్ర మహా సంగ్రామం’గా పిలుస్తారు. పాండవులు యుద్ధానికి వెళ్ళే ముందు తమకు విజయం చేకూరాలని ఈ భద్రకాళీ దేవినే పూజించారని చరిత్ర కధనం. ఇక్కడే వున్న చారిత్రిక మఱ్ఱి వృక్ష ప్రదేశంలోనే శ్రీ కృష్ణుడు అర్జునుడికి గీతోపదేశం చేసాడు. 

ఈ భద్రకాళీ దేవి ఆలయంలో భక్తులు తమ కోరికలు నెరవేరాలని, వాటిని పొందడం కోసం, మరల తమను మళ్ళీ ఇక్కడకు రమ్మని దీవించాలని, ఈ దేవికి “మృత్తికతో చేసిన ఆశ్వ విగ్రహాల” (మట్టి టెర్రకోట గుర్రం)ను మందిరం హాలు మధ్యలో వున్న “దేవీ పాద” కమలం వద్ద మొక్కుబడిగా సమర్పించుకుంటారు. ఇదే హాలులో ఇంకా రాధ-కృష్ణులు, శ్రీ కృష్ణుని విశ్వరూపం, శ్రీ సీతా-రామచంద్రుల విగ్రహాలను ప్రతిష్టించారు. ఇది ఒక “తప్పక చూడవలసిన” ధార్మిక, చారిత్రక పవిత్ర ప్రదేశం.

శ్రీ భద్రకాళి అమ్మవారిని పరోక్ష దర్శనం చేసుకుని, దేవి కృపా కటాక్షణాలకు పాత్రులు కండి..!! శుభం భూయాత్